香港傳統麵包老店愈嚟愈少，但最近就有一間麵包店「森林麵包」喺疫境下開鋪
由多位本地大師傅親自助陣嘅「森林麵包」特意選址前身經營近 30 年嘅老字號麵包店「新雄雞」，
希望以味道傳承近失傳嘅本土麵包手藝，鍾意食舊式麵包嘅朋友一定要留意！
新店糅合傳統同創新元素，特別製作咗一系列打卡必食包點，好似呢款全港最「流」爆醬飛碟包咁！
麵包店重新設計買少見少嘅傳統港式麵包「飛碟包」，喺包內加入咗爆醬流心餡，每日限量 100 個，賣完即止
「飛碟包」仲有多款口味，有 OREO、阿華田、鷹嘜煉奶同宇治 抹茶味，聽到都想食呀
至「脆」菠蘿 方包亦全新推出 3 款口味，包括黑芝麻湯圓菠蘿方包、別宇治抹茶紅豆菠蘿方包同埋紫薯菠蘿方包
鍾意食芫荽嘅你亦可以試吓呢個芫荽蒜蓉包，保證會衝擊你嘅味覺！
當然唔可以錯過勁邪惡嘅芝心拉絲菠蘿包，外酥內嫩加埋咸香芝士，咸咸甜甜勁好食
店鋪亦好貼心地推出咗居家抗疫必試 D.I.Y「冷凍菠蘿油」，
師傅先將菠蘿包焗至 8 成熟然後馬上進行急凍，過程中鎖住麵團水份，
每個均配上一片急凍牛油， 加熱後就可以安心喺屋企食到茶餐廳級數嘅金黃酥脆菠蘿油
森林麵包
店舖地址：牛頭角振華道 70 號樂華北村商場 111 號舖
開店日期：2020 年 8 月 18 日
營業時間：每日 6am 至 9pm