最近百年古跡和昌大押新開咗一間懷舊粵菜，餐廳環境特具古典氣息，亦不失華麗氛圍~ 好似灣仔呢個新舊融合嘅地區，和昌飯店都係主打老菜新做~用創新嘅方法演繹經典粵菜，仲會加入茶嘅元素。 墻身係墨綠碎花紋，好啱打卡~ 座位亦好舒適~餐廳有兩層，二樓係包廂，適合家庭聚會。 分別有綠色、黃色、粉紅色三色廂房，每間包廂都連埋露台~ 店內一共有20多款高級茗茶，推介白蘭花茶，有淡淡嘅白蘭花香氣，清新解膩。 雙囍富貴鴿：以鳥巢嘅方式呈獻非常吸睛，乳鴿皮薄香脆，肉汁豐富，配上茶燻鴿蛋，幾有特色。 鳳梨咕嚕肉：外脆內軟，中間仲保留到豐富肉汁，配上爆炸糖好特別。 和昌炭燒叉燒：口感鬆軟，帶有炭燒味，炭燒做法令到叉燒更加香口，減少甜膩嘅感覺。 富貴牡丹花：將蝦肉切成牡丹花嘅形狀，睇得出師傅精湛刀工，賣相精緻，蝦肉爽彈清甜，配上龍蝦汁特別惹味~ 點心拼盤（桂花香桂花魚餃、蘿蔔手作千絲酥、三文魚釀茶香豆腐）：尤其推介桂花香桂花魚餃，有清香桂花味，皮薄彈牙。 薑蔥鮑魚汁蝦籽撈麵：食落鮮美惹味，麵嘅口感彈牙。 松茸白菜：呢道菜非常考究師傅刀工，睇到賞心悅目。 羊肚菌燉螺頭：湯汁清甜香濃，螺頭都好鮮甜，用料講究。 甜品拼盤（百利咖啡蛋撻，山西棗黃椰汁糕、公利蔗汁卷） 特別推介公利蔗汁卷，食落清甜~ 另外棗黃椰汁糕都好出色，棗香味香濃，唔會好甜，口感煙煙韌韌，好味。 整體而言，食物味道出色，擺盤精緻，用料講究，值得一試！ 和昌飯店 地址：灣仔莊士敦道62號1至2樓
