嚟到旺角區，食啲咩嘢好？ 旺角咁多嘢食，的確好難樣樣試。 求其行入一間餐廳又怕中伏，又貴又唔抵食？ 想知旺角有咩好食、抵食、最多人食？ 跟住平民美食地圖，教你由太子出發、一條路搵盡平價美食啦！ [youtube youtubeurl=VQEmXpLSDwc][/youtube] 小編：嘉儀（IG: chongkkayee） 第一站：津津好好味（麻辣小雲吞 $20/12粒） 雲吞皮好薄，仲要好抵食、19蚊仲要有12粒！ 麻辣味好香，食得辣嘅朋友一定要叫麻辣！ 地址：太子長沙灣道51號地下 第二站：利口福快餐店（沙嗲牛肉包 $16） Sell人情味嘅呢間細舖，所有沙嗲牛肉包都係即叫即做！ 熱辣辣放入口，好好味啊～～～ 地址：太子界限街43號恆富大廈地下1號舖 第三站：金華冰廳（鮮油菠蘿包 $10） 呢個菠蘿油出名到攞獎，一定一定一定要新鮮出爐嘅時候買！ 包夠熱、牛油夠凍，邪惡到肥10磅都要食！ 地址：太子弼街47號地下 第四站：奇趣餅家（紅豆燒餅 $5） 要喺香港搵到紅豆燒餅，其實唔難 不過要搵到啖啖紅豆嘅足料版，應該就非奇趣莫屬喇！ 地址：旺角花園街135號地下 第五站：Modos（流心蜂蜜雞蛋仔 $23） 雞蛋仔即叫即整，心急嘅朋友仔要畀啲耐性～～ 記得要快啲食，雞蛋仔凍咗淋晒就冇咁好味！ 粒粒雞蛋仔都有蜂蜜爆珠，一放入口就有流心效果～ 地址：旺角花園街174號A1舖 第六站：Candy Shake（抹茶芝士流心撻 $20） 覺得原味芝士撻太寡？加埋抹茶又啱唔啱你口味？ 其實仲有好多種口味任你揀！ 記得記得，店員話趁熱食先流心㗎～ 地址：旺角登打士街55號 係咪睇到好肚餓呢～～ 有齊哂地址，下次去到旺角就唔怕冇啖好食啦！ 仲唔即刻出發去旺角掃街？ *文中食物價錢只供參考* ——————————– 放假去邊 更多好介紹: Facebook Instagram
