法國巴黎被譽為「最浪漫」嘅城市之一，值得到訪嘅名勝古蹟多不勝數！ 而其中一個地方一定係凡爾賽宮～ 最近呢度仲打造咗全球首座宮廷酒店——Le Grand Contrôle！ 以往有嚟過凡爾賽宮嘅朋友都應該知道， 宮殿佔地面積寬廣，有成110萬平方米！ 設有超過2,300間房，仲放置咗無數幅名畫、歷史文化珍品同雕塑等～ 真係要用幾日時間先行得哂㗎！ 由1624年直至而家，凡爾賽宮經歷過路易十三、路易十四、瑪麗皇后、 法國大革命、凡爾塞和約簽訂等重要嘅故事～ 充滿歷史意義！ 而位於凡爾賽宮內嘅Le Grand Contrôle， 只係喺2021年6月先正式開放入住，由Airelles Collection酒店集團所管理～ 打造出呢座「一生人必住一次」嘅華麗宮廷酒店！ 呢座酒店由17、18世紀嘅三座建築改建而成～ 仲係由法國著名室內設計師 Christophe Tollemer 親自操刀， 除咗保留原有嘅古典建築風貌之外，亦加入現代元素去翻新，極具特色！ 住客可以喺咁華麗嘅建築裡面，享受到法國貴族王室同等嘅待遇！ 因為每位住客都會獲分配一位管家，更貼心照顧你嘅需要！ 住客可以亦盡情使用酒店內嘅設施，包括電動高爾夫球車、電動船、水療中心～ 仲可以品嚐由法國名廚 Alain Ducasse 主理嘅餐廳，真係奢華級嘅享受呀！ Le Grand Contrôle酒店一共有14間客房， 每間客房嘅室內設計相當有特色！ 你係咪都好想體驗一下王室宮廷嘅生活呢？ Photo credits: Le Grand Contrôle INFO 地址：12 Rue de l’Indépendance Américaine, 78000 Versailles, France 房價：1,500歐元 （約港幣13,200起） 詳情：官網 [map url=”https://www.google.com/maps/embed?pb=!1m18!1m12!1m3!1d2627.9819417932003!2d2.1177337156171583!3d48.801323279281895!2m3!1f0!2f0!3f0!3m2!1i1024!2i768!4f13.1!3m3!1m2!1s0x47e67dac7b84d7a7%3A0xf7ac9d741c57d6c7!2sAirelles%20Ch%C3%A2teau%20de%20Versailles%2C%20Le%20Grand%20Contr%C3%B4le!5e0!3m2!1sen!2shk!4v1636179376541!5m2!1sen!2shk”][/map]
