Open Tour
呢啲天氣就一定要食啲熱辣辣~熱到冒煙嘅食物，今次推介呢間米線舖唔知大家試過未呢！ 香格里拉酒店就聽過喇~今次呢間米線店都係叫香格里拉米線專門店喔，雖然唔可以同酒店食物相比，但食物質素一定唔會差，小店喺香港米線關注組入面經常被網民稱讚~ 店內主打雲南、貴州口味米線，簡直係嗜辣者天堂呢度~辣度總共分為9個級別，湯底就有6款。 呢款係重慶麻辣二小辣湯底，呢度嘅二小辣俾一般連鎖店辣度更強、更刺激，配上豬紅、雞肉，仲有豬潤，好鬼惹味~ 麻辣湯底配上鮮竹蝦春卷、司華力腸兩款都係炸物，幼米線食落好爽口~麻喇湯真係辣得好過癮，食到爆汗！冬天食完個人都㷫烚烚，即炸鮮竹蝦春卷，食落好香口~ 司華力腸炸至香脆，好似街邊檔燒出嚟果種味道同口感。 蒙古大汗烤豬腿，呢個超正喔~好香孜然味道！ 香格里拉米線專門店 地址：觀塘牛頭角道345號地舖 電話：6931 3778 營業時間：11:00～22:00 圖片來源：@eatgoodwesteatbadwest、@food_fatjai
大圍呢間米線鋪好受歡迎，聽聞要排2個鐘先食到~真係好誇張~ 近期搬咗新鋪~大家去食就記得留意新地址啦。 必試招牌滷鴨片麻辣湯米線，滷鴨係少有嘅米線配料，非常入味，口感軟淋，好食。 麻辣湯底幾惹味，唔會覺得好油膩。 手撕雞酸辣湯米線都係店內人氣之選，酸辣湯底開胃又惹味，配上手撕雞好夾~ 秘製豬頸肉都係店內招牌，遲啲去到可能就售罄~好搶手。 另外都有多款小食，推介涼拌麻辣豬耳、粟米花枝餅，仲有炸饅頭！ 招牌手拉奶茶係必試，飲落唔係好甜~配辣米線一流！又可以解辣~ 肆年八月米線專門店 地址：大圍上徑口村148號地下（港鐵顯徑站A出口, 步行約4分鐘） 圖片來源：@ossanpig_foodie、@noodles_queen_food
各位米線控！平時大家食嘅連鎖店米線，但小店其實都好正，位於深水埗嘅米線小店，主打售賣麻辣湯底米線，仲有超過50款配料俾你揀！湯底辣得嚟有啲甜，酸酸麻麻，真係超過癮~ 麻椒雞肉米線，入面又雞絲同鮮麵筋。 食米線精髓，梗係要試埋個麻辣湯底喇~呢款辣係後勁先嚟料嘅~ 大腸同雞絲配麻椒湯底，一樣咁惹味。 烤燒蜜汁豬頸肉，半肥瘦食落非常香口。 麻辣黑白柏葉，黑白牛栢葉雙拼，配埋啲醬汁超好食。 麻辣川米線 地址：長沙灣元州街213號美居中心商場地下22號舖 營業時間：11:30-23:00 電話：2386 2684 圖片來源：@food_fatjai、@hk_goodwest_foodies、@venus_foodholic、@wingwing.foodfood
