上環又有美食又有靚景，一向都係覓食好地方！
今次就同大家推薦上環三間高質嘅餐廳，全部都係食東南亞菜～ 睇吓邊間啱你心水？
1. Lee Laksa
新加坡喇沙 ($82) 係餐廳嘅招牌菜！湯底用咗南薑、蝦米、桂皮等10幾香料炮製超過5個鐘！
超級濃郁！微辣得嚟帶有椰香，真心好好好好食！
材料超豐富，絕對值食！連鮮蝦都有4隻～
彈牙米線、豆卜、魚片、魚蛋… 吸晒湯底濃郁香味～
另外仲試咗餐廳另一推介 李派海南雞飯 ($88)！
份量都幾多！勁多雞件、油飯，仲有碗冬瓜湯～
海南雞皮薄肉嫩，配黑醬油、雞油飯簡直一流！
油飯都算幾入味、唔會過份油膩，依然keep到米粒分明～
而小編最鍾意嘅係 檳城蝦麵 ($86)！湯底嘅蝦味係極級濃郁！
啖啖飲落都好鮮甜、好重蝦味，但飲晒都完全冇口乾～
份量同樣好足～ 重點係佢哋用咗油麵+米粉，夠晒正宗！
Lee Laksa
地址：上環皇后大道中302號地舖
電話：2265 8999
2. 泰館
泰館係上環其中一間人氣餐廳，小編當日就襯晏晝少啲人嘅時間，去試吓佢個Lunch～
Menu選擇唔算多，以傳統泰菜 (例如炒金邊粉、泰式咖哩等等) 為主，所以就揀咗佢嘅 泰式黃咖哩雞 ($148)！
肉質好嫩滑，輕鬆可以撕晒雞脾啲肉落嚟！
而且咖喱夠晒濃郁惹味！小編表示好想配白飯啊…
可惜價錢有少少貴… 套餐唔包飲品、唔包飯/麵…
$148只有兩隻雞脾、幾件薯仔+青瓜 🙁
泰館
地址：上環上環蘇杭街23號地下
電話：2234 0080
3. 越蘆越南牛肉粉
食越南菜就梗係要試生牛河！餐廳主打嘅 越南牛肉粉 ($72) 份量十足，有齊生牛肉、牛腩片、牛丸、牛柏葉…
湯底惹味醒胃，牛肉味香濃～配埋滑溜河粉食，味道都幾正宗！
不過小編最鍾意嘅係 芒果牛油果軟殼蟹米紙卷！
軟殼蟹炸得超香脆，而且啖啖肉，好少食得咁有肉地嘅軟殼蟹～ 配埋清新嘅芒果+牛油果，勁夾！
滴漏咖啡 ($28) 口感香醇，真係有越南咖啡嗰種獨特香味！
而牛油果沙冰 ($38) 就最適合夏天飲，消暑一流～
越蘆越南牛肉粉
地址：上環皇后大道西2-12號聯發商業中心地下B舖
電話：2782 7999