荃灣出晒名多好嘢食，今次小編就試咗兩間東南亞菜！
食物價錢抵，而且質素幾高，絕對試得過！
第一間係專食新加坡菜+馬來西亞菜嘅餐廳「馬六」！
新加坡喇沙摻摻
呢個喇沙最正係用咗油麵+米粉，彈牙、掛湯，又夠正宗！
湯底超濃郁，豆卜吸晒啲味勁好食！仲有鮮蝦、蜆肉等海鮮～
馬六無骨海南雞飯 拼巴生肉骨茶
鍾意食海南雞飯嘅朋友仔，呢間真心推！無論係份量、味道、質素都係一流！
嫩滑雞肉配油飯，再加秘製醬汁，夾到爆～ 重點係巴生肉骨茶！勁足料已經好濃郁，可以翻兜！
巴東牛肉飯
如果想食啲濃味嘅飯餐，呢個就絕對適合喇！巴東牛肉微辣得嚟勁惹味，個醬汁撈飯一流！
牛肉份量好多，而且夠晒淋，肉質唔鞋～
檳城蝦麵
蝦麵都係星馬菜必食之一，呢間做得幾唔錯！湯底真‧好濃蝦味，但飲晒都唔會口渴～
而且用料、份量十足，食極都仲有，勁高CP值！
南洋咖央多士 (斑蘭)
點可以唔試埋咖央多士？
厚切牛油+香濃斑蘭醬，再加香脆多士！小編保證，呢個會食唔停口！
芒果冰
飲品方面，小編就最推介芒果冰！因為真係有半個芒果喺隔離！
飲完濃郁嘅芒果冰之後，仲可以食埋香甜嘅芒果，爽！
馬六
地址：荃灣眾安街68號荃灣千色匯1樓1023A號舖
而另一間食越南菜嘅餐廳就叫「越北牛肉粉」，就喺正「馬六」隔離！
一場嚟到，梗係要試埋佢啦～
越北綜合牛肉湯粉
食越南菜，首先梗係試佢嘅生牛河！
呢碗牛肉粉除咗有生牛肉之外，仲有牛腩片、牛丸等等，啱晒一眾牛魔王啊～
順化香茅牛肉撈檬
小編當日仲試咗撈檬！檬粉彈牙，配合秘製酸汁都幾開胃～
不過重點係牛肉！真係好嫩滑好好味！
法式蒜蓉牛油雞翼
小食方面，小編首推係蒜蓉牛油雞翼！
雞翼size勁大，而且外皮炸得香脆，配埋蒜蓉牛油，點會唔好食？
鮮蝦米紙卷
米紙卷都幾唔錯，清清地～ 配埋其他濃味嘅主菜一齊食，都幾夾！
越北牛肉粉
地址：荃灣眾安街68號荃灣千色匯1期1樓1023號舖