天氣咁熱，行街、食飯通常都想匿喺商場，嘆冷氣食好嘢！但全港咁多商場，花多眼亂唔知點揀好？
識飲識食嘅小編最近去開大角咀，發現附近嘅「港灣豪庭廣場」幾有驚喜喎！價錢唔貴之餘，仲有齊港式茶記、中式小炒、西餐、台式風味、越南菜等等！色香味俱全、份量夠，絕對係極高CP值之選～
1. 越南滋味 – 樂越
鍾意食越南菜嘅朋友，呢間就啱晒你喇！人氣限定推介生牛肉湯河竟然係用西班牙安格斯牛肉！牛味濃郁、油花均勻，食落勁嫩滑！食過翻尋味～
仲有 香辣蕃茄大頭蝦湯檬 都真心正！大頭蝦好新鮮，厚肉多膏！配埋蕃茄湯底，味道又鮮又濃啊～
讀者獨家優惠：凡四人起惠顧消費，即 送牛油雞翼一客 及 九折優惠！即日起去到7月23日都有效㗎！
樂越
地址：香港九龍福利街8號港灣豪庭廣場G07A號舖
營業時間：星期一至日 11:30 – 21:30
2. 台式風味 – 一葉小廚
私心推薦台式風味！必試 鹽酥雞扒配香菇肉燥飯，雞扒大細同塊臉一樣大，外皮炸得超酥脆，咬落去勁juicy～ 同台灣夜市嘅雞扒可以一拼高下！香菇肉燥飯濃郁，而且份量十足～
仲有超香濃嘅 秘製紅燒牛肉湯麵，牛肉大件又夠嫩！呢度午市$42起、晚市$50起咋～
一葉小廚
地址：香港九龍福利街8號港灣豪庭廣場G05號舖
營業時間：星期一至日 08:00 – 21:30
3. 西式派對必選 – 必勝客
商場入面仲有Pizza Hut⋯ 咦？好似又有新款Pizza？
原來係強勢回歸嘅 芝士輪盤扭扭批！鍾意食芝心批嘅朋友仔，呢個不能錯過！扭扭批邊入面有香濃芝士，其中兩粒扭扭批仲有黑松露蘑菇醬！而批面就有帆立貝、多款海鮮、芝士、Pizza配料等等，真‧啖啖都係芝味啊～
必勝客
地址：香港九龍福利街8號港灣豪庭廣場G02號舖
營業時間：星期一至日 11:00 – 23:00
4. 中式小炒 – 翠苑餐廳小廚
想食中式小炒，但又想要有驚喜？呢間絕對超值！避風塘龍蝦 係勁好食！新鮮龍蝦啖啖肉，避風塘超惹味～
見到人哋嗌 火焰醉雞煲 上枱嗰陣真係著晒火，幾特別所以又試埋！醉雞勁入味，肉質好嫩滑～
讀者獨家優惠：任何消費即享九折優惠！優惠期去到9月30日㗎～
翠苑餐廳小廚
地址：香港九龍福利街8號港灣豪庭廣場G09號舖
營業時間：星期一至日 07:00 – 22:00
5. 川菜車仔麵 – 譚仔雲南米線
譚仔嚟講，我諗大家冇食過都肯定聽過！但唔講唔知，原來平時揀2款配料、湯底、辣度、飲品、小食，譚仔總共有超過63萬款組合！
喺咁多款配料入面，小編就最鍾意雞肉+炸醬（聽講好多人都會咁揀～）譚仔炸醬真係世界級好味㗎！
最近仲新出咗 茉莉花清茶配糖圓子、柚子利賓納 兩款消暑特飲～ 清新得嚟又解辣！夏天食譚仔必備啊～
譚仔雲南米線
地址：香港九龍福利街8號港灣豪庭廣場G37-38號舖
營業時間：星期一至日 11:00 – 21:40
6. 港式茶記 – 百份百餐廳
茶記都有好推介？邊個話食茶餐廳一定頹！犀飛利七彩牛柳絲脆麵 賣相真係犀飛利，脆麵疊到勁高！醬汁香濃、豐富餡料，配埋脆麵食勁正！
荔芋椰汁雞煲 幾創新，食落甜甜地，又冇平時雞煲嘅油膩感！送飯一流～
百份百餐廳
地址：香港九龍福利街8號港灣豪庭廣場G71-73號舖
營業時間：星期一至日 07:00 – 22:00
7. 傳統潮州菜 – 新大光燈
估唔到呢度連潮州嘢都有！價錢仲要勁實惠！小編就鍾意呢度嘅 蠔仔粥，粒粒蠔仔都脹卜卜又肥美，非常足料！
新大光燈係雲吞麵始祖，馳名巷仔雲吞麵 當然唔可以錯過！雲吞大大粒皮薄餡靚！最吸引人之處，莫過於用大地魚泡製嘅湯底，超好味呀！
新大光燈
地址：香港九龍福利街8號港灣豪庭廣場G74號舖
營業時間：星期一至五 11:00 – 22:00；星期六、日及公眾假期 10:00 – 22:00
咁多嘢食，下次出街食飯識揀啦！
港灣豪庭廣場
地址：香港九龍福利街8號
電話：3144 3350
網址：metroharbourplaza.com.hk
