常言道：「人生得一知己，死而無憾」，可以擁有一位了解你嘅好朋友，真係好難得～
不過做朋友都好講求性格夾唔夾！憑直覺揀一隻你最鐘意嘅狗狗，測出咩類型或者性格嘅朋友值得你深交喇！
1. 哥基犬
你嘅性格同哥基犬一樣直率可愛，對任何事都態度認真，而且鐘意同朋友一較高下～
你認識朋友嘅方式係「不打不相識」，喺共同競爭進步嘅同時，你哋嘅友情亦會越來越深厚。
但有時候，你會忽略咗對方嘅感受～
2. 小獵犬
你對朋友嘅態度係「君子之交淡如水」，你同朋友嘅關係總係保持謙恭禮讓，因為過份親密會令你覺得有壓力。
你鐘意朋友同你一齊追求新鮮事物，所以充滿好奇心嘅人最適合做你朋友。
3. 黑色獵腸犬
你嘅性格比較怕羞，唔係好識得表達自己，所以好少主動去同其他人做朋友，朋友亦唔多。
一旦你同某人成為朋友，你就會好重視呢份友誼，甚至希望同對方形影不離。
同樣重視友情嘅人，最適合同你做朋友，但要記著唔好過份依賴對方，否則會令朋友感到壓力。
4. 沙皮犬
你對人嘅喜惡非常分明，而且對朋友情深義重。
只要你同某人成為朋友，你就會全心全意對待對方，甚至會為好朋友兩肋插刀。
你最適合同本性誠實、善良嘅人做朋友，以誠相待先可以培育出最真摰嘅友誼！